د عدليې وزارت سرپرست او نوماند وزیر ښاغلی قضاوت‌پوه فضل احمد معنوي پیغام

1 ورځ 10 ساعتونهمخکې

د عدليې وزارت سره له دې چې د تیرو ۲۰ کلونو په ترڅ کې د زیاتو بدلونونو شاهد دی او په شکلي لحاظ يې بدلون کړی دی، خو په محتوايې لحاظ زیات، ژور او اړین نوښت ته اړتیا لري. هغه زیاتې ژمنې چې عملي نه وي نه ورکوو خو په همدې حال کې زمونږ اراده صادقانه، زړه سواند او د ژمنې پربنسټ کار کول دي چې له دغو خلکو او له دې خاورې سره يې لرو. د عدليې وزارت د قانون جوړونې او د تقنیني سندونو د پړاوونو د تیرولو په برخه کې د نظام د دریو قواوو ترمنځ د همغږي کوونکي بنسټ په توګه په اختصاصي ډول مؤظف دی. که څه هم د هېواد د قوانینو په لحاظ بډای یو او نه غواړو د نه تطبیق وړ قوانینو څخه له ځنګل سره مخ واوسو؛ خو په قوانینو کې د اصلاحاتو راوړل او د هغو اغیزمن کول اړین کار دی. له عامه او دولتي ملکیتونو څخه دفاع د عدليې وزارت له دندو څخه یوه بله برخه ده، عدالت د نظام د بنسټ ډبره ده او په یوه هېواد کې هر پرمختګ د هغه پربنسټ ترسره کېږي. عدليې وزارت د عدل مرجع ده او له همدې امله له زور، قانون ماتونې او بي عدالتۍ په وړاندې کلک او غوڅ دریږو.