په تېره یوه مياشت کې د ۳۶۰ عريضه ليکونکو له فعالیتونو څخه نظارت شوی دی
د عدلیې وزارت د انسجام عمومي رياست د معاملاتو لارښوونې او د عريضه ليکوونکو د چارو رياست نظارتي پلاوي، د روان هجري قمري کال د محرم الحرام میاشتې په اوږدو کې د کابل ښار په بېلابېلو ساحو کې د ۳۶۰ عریضه ليکونکو له فعاليتونو څخه نظارت ترسره کړی دی.
نظارتي پلاوي د دغو عریضه لیکونکو د فعالیت جوازونه، د عریضو د لیکلو څرنګوالي او نور اړین موارد بررسي کړي چې په پایله کې یې د ۳ عریضه لیکونکو کار د سرغړونو او غیرقانوني فعالیت له امله درول شوی دی.
همدارنګه د نورو عریضه لیکونکو په فعالیتونو کې یو شمېر ستونزې او نیمګړتیاوې مشخصې شوې چې پلاوي د یادو ستونزو د حل او د چارو د ښه پرمخ وړلو په موخه هغوی ته لازمې توصیې کړې دي.
د معاملاتو لارښوونې او د عريضه ليکوونکو د چارو رياست په همدې موده کې د عریضه لیکنې د فعاليت د جواز له ۱۶ تنو غوښتونکو څخه ازموينه اخیستې، ۱۱ تنو ته یې نوي جوازونه ورکړي او ۵۹ نور جوازونه یې تمديد کړي دي.
