په باميان ولایت کې د څه باندې ۸۳۵۰ جریبه امارتي ځمکې استرداد
د باميان ولایت د ځمکو له غصب څخه د مخنیوي تخنیکي هیئت ناسته، د شعبان د مياشتې په ۱۸ مه نېټه، د دوشنبې په ورځ، د یاد هيئت د رئيس او غړو په ګډون جوړه شوه.
په دې ناسته کې تخنيکي هيئت د ځمکو له غصب څخه د مخنيوي او د غصب شويو ځمکو د استرداد کمېسيون د پرېکړې په اساس د یاد ولایت د مرکز اړوند په څلورمه ناحيه کې شپږ زره شپږ سوه شپږ دېرش (۶۶۳۶) جریبه امارتی ځمکه او په اوچکها دښته کې یو زرو اووه سوه پنځلس (۱۷۱۵) جریبه امارتي ځمکې چې له دې وړاندې امارتي تثبیت او تشخيص شوې وې استرداد کړې.
هيئت پرېکړه وکړه چې د یادو ځمکو دوسیې دې د لازمو اجرآاتو په موخه د کرنې رياست ته واستول شي.
همدارنګه، په ياده ناسته کې د باميان ولایت د بېلابېلو ساحو د غصب شويو ځمکو اړوند یو شمېر نورې دوسیې هم بررسي شوې او په اړه یې لازم تصامیم ونیول شول.
