په کندز ولایت کې د ۴۴ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د جمادي الاول میاشتې په ۲۰ نېټې د دوشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د چهاردرې ولسوالۍ د خیرآباد دښتې د څړځای موضوع چې د سمنګان او کندز ولایتونو د مالدرانو تر شخړې لاندې ده، د والي د مرستیال او د یاد ولایت د علماوو د شورا د ریاست سرپرست په حضور کې بحث او بررسۍ لاندې ونیول شوې او پریکړه وشوه چې د همدې اوونۍ په سه شنبې ورځ د سمنګان ولایت د تخنیکي هیئت په همغږۍ له یادې ساحې څخه لیدنه او بررسي ترسره شي.
دغه راز په یاده ناسته کې د کندز ولایت د مرکز په عسقلان ساحه کې د ۱۲۹ جریبه ځمکې، د خان آباد ولسوالۍ د بوین ساحې د ۱۵ جریبه ځمکې او د دشت ارچي ولسوالۍ د قره غوشي ساحې د ۲۱ جریبه ځمکې دوسیو په اړه بحث او د نظرونو تبادله ترسره شوه.
تخنیکي هیئت د خان آباد ولسوالۍ د بوین ساحې ۱۵ جریبه ځمکه او د کندز ولایت د مرکز په عسقلان ساحه کې ۲۹ جریبه ځمکه له متصرفینو څخه د هغو په امارتي والي د لیکل شوي اقرار لیک له اخیستو څخه وروسته، استرداد کړه او د اجارې ورکونې پړاوونو تېرولو په منظور یې لازمې لارښوونې صادر کړې. د عسقلان ساحې د ۱۰۰ جریبه پاتې ځمکې په تړاو هم لازمې لارښوونې وسپارل شوې.
