په ننګرهار کې د عدلیې او د زندانونو د چارو د سمون رياستونو ترمنځ د همغږۍ ناسته ترسره شوه
د ننګرهار ولایت د عدلیې رئيس مولوي محمد رئيس محمدي او مل پلاوي، د ربیع الاول د مياشتې په ۲۳ مه نېټه د سه شنبې په ورځ، د زندانونو د چارو سمون رئیس مولوي سهيل سعيد سره د یاد رياست په مقر کې د همغږۍ ناسته جوړه کړه.
په دې ناسته کې د عدلیې رئیس له مؤکلينو سره د مدافع وکيلانو او د حقوقي مساعدينو د منظمې کتنې، د شرعي او قانوني مشورو وړاندې کول او د هغوی د دوسيو په اړه د معلوماتو شريکول او د عامه حقوقي پوهاوي ورکولو برنامو ترسره کول د عدلیې رياست له مهمو فعاليتونو څخه یاد کړل او په دې برخو کې د زندانونو د چارو سمون رياست له همکارۍ او مرستې څخه مننه وکړه.
په ورته مهال، مولوي سهیل سعید د لا زیاتو مرستو او همکاریو ژمنه وکړه او ټينګار یې وکړ چې د مسؤولیتونو د ښه پر مخ وړلو لپاره د ورته ناستو جوړېدل باید دوام ومومي.
