د کندز ولایت په مرکز کې له ځینو ښارګوټو څخه د یاد ولایت د تخنیکي هیئت لیدنه وکړه
د کندز ولایت د ځمکو د غصب د مخنیوي تخنیکي هیئت د ذوالحجې د میاشتې په ۷ نېټه د یکشنبې په ورځ د یاد ولایت څلورو ښارګوټو ته ولاړ او له نږدې له هغو څخه لیدنه او بررسي ترسره کړه.
یاد شوي هیئت لومړی د رستاق آباد، فیض آباد، نازکمیر سرفراز او آریانا ښارګوټو له مالکانو او اوسیدونکو سره وکتل او هغوی ته استعلامونه وویشل.
ورپسې دغه هيئت یادو څلورو ښارګوټو ته ولاړ او د ساحې او د هغې د اوستوګنې نمرې له نږدې ولیدلې او بررسي کړې او د هغو د سکیچ او کروکي په برخه کې لازمې لارښوونې وکړې.
په آریانا ښارګوټي کې ۱۹ هکتاره ځمکه، په نازکمیر سرفراز ښارګوټي کې ۱۶۰ جریبه ځمکه، په رستاق آباد ښارګوټي کې ۲۰۴ جریبه ځمکه او په فیض آباد ښارګوټي کې ۵۰ جریبه ځمکه شامله ده چې په ۱۳۸۲ او ۱۳۸۸ کلنو کې ویشل شوي دي. د یادو شویو ټولو ښارګوټو ځمکې امارتي دي او د هغو په سندونو څېړنې روانې دي.
تخنیکي هیئت لارښوونه وکړه چې د هيئت ټول غړي په جلا ټیمونو وویشل شي او د یادو ښارګوټو د سندونو پر تطبیق کار وکړي.
