د کنړ ولایت د عدليې ریاست ګډ هیئت د دغه ولایت د معاملو د لارښوونو او موټر پلورنځیو څخه لیدنه وکړه
د کنړ ولایت د عدليې ریاست ګډ هیئت چې په ترکیب کې یې، د امارت د قضایاو امر، د حقوقي مرستو امر او د دغه ریاست د انسجام مدیر شامل ول، د ربیع الاول میاشتې په ۱۵ نېټه د سه شنبې په ورځ د دغه ولایت د مرکز اسعد اباد ښار د معاملو د لارښوونو او د موټر پلورنځیو له دفترونو څخه لیدنه او څارنه ترسره کړه.
په دغې لیدنه کې، یاد هیئت د معاملو د لارښوونو او د موټر پلورنځیو د دفترونو کارونه په دقت سره وڅیړل او د هغو د فعالیت جوازلیکونه، سټې او د ثبت کتابونه یې بررسي کړل.
دغه راز یاد هیئت هغوی ته په کارونو کې د روڼتیا او له سود (ربا) څخه د مخنیوي په اړه توصیه وکړه.
یاد هیئت د عدليې ریاست له لوري په دغه ولایت کې د معاملو د لارښوونو او د موټر پلورنځیو د دفترونو د نظارت او بررسۍ په منظور تعیین شوی دی.
