د کورونو د کرايې د کنټرول د ګډې کمېټې ناسته جوړه شوه
د کورونو د کرايې د کنټرول ګډه کمېټه چې د عدليې وزارت په رهبرۍ او د امنيې قوماندانۍ، استخباراتو، ښاروالۍ او نورو اړوندو امارتي ادارو په غړيتوب جوړه شوې، خپله لومړۍ ناسته ترسره کړه.
دا ناسته د صفرالمظفر د میاشتې په ۸مه نېټه د عدليې وزارت مسلکي معين، شيخ الحديث مولوي عبدالکريم حيدر په مشرۍ او د غړو ادارو د استازو په ګډون د دغه وزارت په مقر کې ترسره شوه.
کمېټې پرېکړه وکړه چې د استوګنې د کورونو مالکان اجازه نه لري چې د خپلو کورونو کرايه د ۱۴۰۳ کال په پرتله له ۱۰ سلنې څخه زياته کړي او له دې سلنې د زیاتېدو په صورت کې دې سرغړونکي تر قانوني تعقيب لاندې ونیول شي.
کمېټې همدارنګه پرېکړه وکړه چې هغه کرايي قراردادونه چې په سپين کاغذ او يا په خپلهجوړو شویو سټو کې ليکل شوي وي، رسيدګۍ لپاره معتبر نه دي او د ترلاسه کېدو په صورت کې تر قانوني تعقيب لاندې نیول کېږي. هغو کسانو چې په سپين کاغذ يا په خپلهجوړو شویو سټو کې معاملې کړې دي، هغه دې ژر تر ژره د معاملاتو لارښوونې په رسمي سند کې درج کړي.
د کورونو د کرايې د کنټرول ګډه کمېټه په مرکز کې د عدليې وزارت په رهبرۍ او په ولايتونو کې د عدليې رياستونو په رهبرۍ په جدي توګه د کورونو د کرايې له قراردادونو نظارت کوي او د کرايې زياتوالي او يا غير رسمي قرارداد د مشاهدې په صورت کې به، له سرغړونکو سره جدي چلند وکړي.
