د هېواد په ۱۸ ولایتونو کې د ځمکو د غصب اړوند د کابو ۵۰ دوسیو په اړه د کمېسیون پریکړه
![.](/sites/default/files/2024-01/awl_9.jpg)
د ځمکو د غصب د مخنیوي او د غصب شویو ځمکو د استرداد کمېسیون ناسته د رجب المرجب د میاشتې په ۱۸ نېټه د سه شنبې په ورځ د عدليې وزارت د سرپرست او د یاد کمېسیون رئیس شیخ الحدیث مولوي عبدالحکیم شرعي په مشرۍ د عدليې وزارت په مقر کې جوړه شوه. په یاده ناسته کې د نږدې ۵۰ دوسیو په اړه چې په کې څه د پاسه ۱۰۵ زره جریبه ځمکه شامله ده، لازمې پریکړې وشوې.
په دغې ناسته کې د کور او ښار جوړولو د وزارت سرپرست مولوي حمد الله نعماني، د کرنې، اوبو لګولو او د مالدارۍ وزارت سرپرست مولوي عطاء الله عمري، د سرحدونو، قومونو او قبایلو د وزارت معین مولوي محمد اسماعیل غزنوي، د سترې محکمې استازی شیخ عبدالصمد حقاني، د امارت د قضایاوو لوی رئیس او د یاد کمېسیون سکرتر مولوي احسان الله وثیق او نورو مسؤلینو ګډون درلود.
په یاده ناسته کې د هېواد په ۱۸ ولایتونو کې د ځمکو د غصب اړوند د کابو ۵۰ دوسیو په اړه چې په هغو کې څه د پاسه ۱۰۵ زره جریبه ځمکه شامله ده بحث وشو. د دغو ځمکو ډیره برخه په جوزجان، ارزګان، غزني، بلخ، میدان وردک او کندز ولایتونو کې موقعیت لري او کمېسیون د یادو ځمکو ډیرې برخې په اړه چې امارتي تثبیت شوي پریکړه وکړه چې استرداد شي، په اجاره ورکړل شي او یا د هغو اړوندو ادارو ته وسپارل شي.
دغه راز کمېسیون پریکړه وکړه چې یو شمېر یادې شوې دوسیې اختصاصي محکمې ته محول کړل شي ترڅو موضوعات یې بررسي کړي او په اړه یې وروستۍ تصمیم ونیسي.
دغه راز په یاده ناسته کې د کمېسیون او د ولایتي تخنیکي هیئتونو له خوا د څو موضوعاتو د لازیاتو بررسیو په اړه پریکړه وشوه.