د کابل ښار په دوه یمه ناحیه کې له ۳۱ دارالوکالو نظارت او بررسي ترسره شوه
د اسلامي امارت د عدليې وزارت د مدافع وکیلانو نظارتي پلاوي د جمادي الاول میاشتې په ۲۲ نېټې د چهارشنبې په ورځ د کابل ښار په دوه یمه ناحیه کې له ۳۱ دارالوکالو نظارت او بررسي ترسره کړه او د هغو متصدیانو ته یې لازمې لارښوونې وکړې.
یاد هیئت د بررسۍ په ترڅ کې ۲ دارالوکالې چې د هغو د فعالیت ناحیې د هغو له جوازونو سره مطابقت نه درلود او د هغو په جوازونو کې د درج شوې ناحیې په خلاف یې فعالیت درلود، وپېژندلې.
یاد هیئت، د یادو مدافع وکیلانو د هویت کارتونه او د وکالت مهرونه قید کړل او د یادو دارالوکالو متصدیانو ته یې توصیه وکړه چې د مدافع وکیلانو ریاست ته حاضر شي او د خپل فعالیت ناحیو ته د خپلو جواز لیکونو مطابق تغیر ورکړي. دغه راز د یوې بلې دارالوکالې لوحه چې د هغې د جواز مطابق نه وه، اصلاح شوه.
