د میدان وردک ولایت د معاملاتو د لارښوونې دفترونو له مسؤلینو سره د یاد ولایت د عدلیې رئیس کتنه
د میدان وردک ولایت د عدلیې رئیس مولوي مطیع الحق عثمان د ربیع الثاني د میاشتې په ۲۰ نېټې د شنبې په ورځ د یاد ولایت د معاملاتو د لارښوونې دفترونو له یو شمېر مسؤلینو سره د عدلیې ریاست په مقر کې وکتل او خبرې وکړې.
په دغې ناسته کې چې د چارو د لا ښه والي او د لا زیاتې همغږۍ په منظور جوړه شوې وه، د میدان وردک ولایت د عدلیې رئیس د موضوع په تړاو خبرې وکړې او د معاملاتو د لارښوونو د دفترونو د مسؤلینو د دنیوي او اخروي مسؤلیتونه یادونه وکړه.
نوموړي د یاد ریاست د انسجام لوی مدیر هم د معاملاتو د لارښوونې دفترونو مسؤلینو ته وروپېژند او له هغوی څخه یې وغوښتل چې له نوموړي سره همکار واوسي.
وروسته د میدان وردک د عدلیې ریاست د انسجام لوی مدیر د کړنلارو، لیکونو او له عدلیې وزارت څخه د رارسیدل شویو لارښوونو په اړه معلومات ورکړل او ژمنه یې وکړه چې د قانون په چوکاټ کې به له هغوی سره همکار واوسي ترڅو د ناقانونه پېر او پلور مخنیوی وشي.
په دغې ناسته کې، د معاملاتو د لارښوونې د دفترونو مسؤلینو هم د خپل د اجراآتو راپور او ستونزې له عدلیې رئیس سره شریکې کړې چې د عدليې رئیس له لوري په دغې برخه کې هغوی ته لازمې لارښوونې وشوې.