په کندز ولایت کې ۵۸۰ جریبه امارتي ځمکې تثبیت شوې
د کندز ولایت د ځمکو د غصب د مخنیوي د تخنیکي هیئت ناسته د ربیع الاول د میاشتې په ۲ نېټې د یکشنبې په ورځ د دغه هیئت د رئیس او غړو په حضور سره جوړه شوه او د چهاردرې ولسوالۍ د اچي کوتل ساحې د ۵۲۳ جریبه ځمکې او د ګلتپې ولسوالۍ د شادولا کلي د ۵۷ جریبه ځمکې دوسیې په کې بحث او بررسۍ لاندې ونیول شوې او یادې شوې ځمکې امارتي تثبیت شوې.
په دغې ناسته کې، د قلعه ذال ولسوالۍ د ظلم آباد ساحې د ۳۶۰ جریبه ځمکې او د خان آباد ولسوالۍ د نوآباد ساحې د ۲۰ جریبه ځمکې دوسیې هم بحث او بررسۍ لاندې ونیول شوې او د یاد هيئت سکرتریت ته د څېړنو د بشپړولو او د راتلونکو اجراآتو په برخه کې لازمې لارښوونې وشوې.
دغه راز په یاده ناسته کې، له تخنیکي هیئت څخه دوه ټیمونه د چهاردرې ولسوالۍ د اچي کوتل او د قلعه ذال ولسوالۍ د ظلم آباد د ساحو لیدنې، سکیچ، کروکي او د سندونو د تطبیق په موخه توظیف شول.
