سمنګان ولایت کې څه دپاسه ۳۸۰ جریبه ځمکه امارتي تثبیت شوه
د سمنګان ولایت د ځمکو د غصب د مخنیوي تخنیکي هیئت د ۱۴۴۵هجري قمري کال د محرم الحرام د میاشتې په ۱۴ نېټه د دوشنبې په ورځ د دغه ولایت د مرکز اړوند د رباطک کلي بازارک ساحه بررسي کړه او دغې ساحه کې د بررسۍ لاندې ۴۴۰ جریبه ځمکې له مجموعې څخه د هغې ۳۸۰.۲۶ جریبه امارتي تثبیت کړه.
په یادې ساحه کې یو شمیر افرادو او اشخاصو د امارتي کادستر پر ټوټو د تیلو ټانک، رستورانت، دوکانونه او د مخابراتي شبکې یوه پایه آنتن په غیر قانوني ډول جوړ او په کرایه ورکړې دي.
تخنیکي هیئت د سمنګان ولایت د کرنې او اوبو لګولو ریاست ته لارښوونه وکړه چې د هغو د کرایې پاڼې ترتیب او د بیې ټاکلو پلاوي له خوا د ساحې د بیې تثبیت څخه وروسته په اجاره ورکړل شي.
