کابل او فراه ولایتونو کې له ۴۷۰۰ جریبو څخه زیاته ځمکه امارتي تثبیت شوه
د کابل او فراه ولایتونو د ځمکې د غصب د مخنیوي تخنیکي هیئتونو دغو ولایتونو کې له ځینو سیمو څخه لیدنه وکړه او نږدې ۴۷۲۲ جریبه ځمکه یې امارتي تثبیت کړه.
د کابل ولایت د ځمکې د غصب د مخنیوي تخنیکي هیئت د چهار آسیاب ولسوالۍ د حاجي مرجان ښارګوټی، د حاجي رحمت الله ښارګوټی، د چهل دختران اړوند میاخیل کلي او د سقاوې دښتې ملا عبدالکبیر ښارګوټی له نږدې وکتل او بررسي کړل.
یاد هیئت ددغو سیمو له ځايي خلکو او مشرانو سره وکتل او د امارتي ځمکو د تصفيې او بررسۍ په اړه يې د اسلامي امارت د مشرتابه پیغام هغوی ته بیان کړ.
یاد هیئت د سیمو جي پي اس ټکي واخیستل او د هغو له متصرفینو څخه يې سندونه او شرعي قبالې وغوښتلې او هغوی ته استعلام ورکړل شو ترڅو ځواب ورکړي.
یاده هیئت، د میاخیل کلي د ځمکې له بررسۍ څخه وروسته چې نږدې ۲۰۰۰ جریبه کیږي، امارتي تثبیت کړه . ددغې ځمکې متصرفینو سندونه نه درلودل او د هغې په امارتي توب يې اقرار وکړ. د یاد شوو سیمو او د ښارګوټو نور سندونه هم د هیئت تر بررسۍ لاندې دي.
په همدې حال کې، د فراه ولایت تخنیکي هیئت ددغه ولایت په مرکز کې غلامان سیمې ته ولاړ او ۲۷۲۲ جریبه ځمکه يې عامه مرعی او امارتي تثبیت کړه.
ددغې ځمکې یوه اندازه کرنیزه ځمکه ده چې په تصرف شوو ځمکو سرپناه، کورونه، څاګانې او نور تاسیسات جوړ شوي دي.
هیئت د سیمې متصرفینو او اوسیدونکو له پاره د امارتي ځمکې د غصب او پکې له ودانیز کارونو څخه د ډډې کولو په اړه جدي لارښوونې صادرې کړې.
