په کندز ولایت کې د تېرې څه د پاسه یوې میاشت په اوږدو کې د ۳۸ دارالوکالو نظارت او بررسي
د کندز ولایت د عدلیې ریاست د مدافع وکیلانو نظارتي پلاوي د یاد ولایت په مرکز کې د تېرې څه د پاسه یوې میاشتې (د مرغومې د میاشتې له پیل څخه تر دې دمه) په اوږدو کې له ۳۸ دارالوکالو نظارت او بررسي ترسره کړې ده.
یاد پلاوي د دغه نظارت په ترڅ کې په دارالوکالو کې موجودې تشې او نیمګړتیاوې مشخصې کړي او د هغو د لري کولو په برخه کې لازمې لارښوونې وکړي. نظارتي پلاوي دغو دارالوکالو ته وخت ورکړ ترڅو د مدافع وکیلانو د کړنلارې مطابق، نیمګړتیاوې لري کړي او خپل فعالیت ته د دغې کړنلارې مطابق دوام ورکړي.
دغه راز یاد پلاوي هغو وکیلانو ته چې د دارالوکالو په دفترونو کې یې پخواني قاضیان په کار بوخت وو، لارښوونه وکړه ترڅو هغوی له دندو ګوښه کړي او په دغو دفترونو کې هغوی ته د فعالیت اجازه ور نه کړي.
نظارتي پلاوي د مدافع وکیلانو یو شمېر ستونزې چې په ولایتي او د ولسوالیو محاکمو کې ورسره مخ دي هم واورېدې او ژمنه یې وکړه چې دغه ستونزې به له ذیصلاح مقاماتو سره شریکې کړي.
