په پکتیکا ولایت کې د ۲۰۰ زره جریبه ځمکې بررسي کېدل
د پکتیکا ولایت د ځمکو له غصب څخه د مخنيوي تخنيکي هيئت د رجب المرجب د مياشتې په ۱۳ مه نېټه، د سهشنبې په ورځ، د غصب شويو ساحو د بررسۍ په موخه د یاد ولایت د ډيلې ولسوالۍ اړوند ډګري ساحې ته سفر وکړ.
تخنيکي هیئت د یادې ولسوالۍ له ولسوال او نورو سیمه ییزو مسؤولینو او اوسېدونکو سره وکتل او په دغه ولایت کې یې د ځمکو له غصب څخه د مخنیوي تخنیکي هیئت د جوړیدو او د یو شمېر نورو موضوعاتو په تړاو معلومات وړاندې کړل.
وروسته تخنيکي هيئت په یاده ساحه کې کابو دوه سوه زره (۲۰۰۰۰۰) جریبه ځمکه له نږدې بررسي کړه او د ولسوالۍ له مسؤولينو څخه یې غوښتنه وکړه چې د موضوع تر نهايي کېدو پوري د هر ډول نويو تصرفاتو مخه ونيسي.
په ورته مهال تخنيکي هيئت د سیمې له اوسېدونکو سره په خبرو کې وویل چې که چیرې دوی د یادو ځمکو اړوند اسناد ولري، نو باید هغه د تخنيکي هيئت سره شریک کړي.
