په غور ولایت کې د څه باندې ۳۷۵۶ جریبه امارتي ځمکې تشخيص
د غور ولايت د ځمکو له غصب څخه د مخنيوي تخنیکي هيئت ناسته د شوال د مياشتې په ۲۹ مه نېټه، د یکشنبې په ورځ، د یاد هيئت د رئیس او غړو په ګډون جوړه شوه.
د تخنيکي هيئت په دې ناسته کې د یاد ولایت د مرکز ولسوالۍ اړوند په لاخ ميدانک کلي او د پوهنتون ختيځ لوري کې د څه باندې درې زره اووه سوه شپږ پنځوس (۳۷۵۶) جریبه ځمکو دوسیې بررسۍ لاندې ونيول شوې او په ترڅ کې یې یادې ځمکې امارتي تشخیص کړې.
هيئت پرېکړه وکړه چې د یادو ځمکو دوسیې دې د وروستۍ پرېکړې په موخه مرکزي کمېسيون ته واستول شي.
همدارنګه په دې ناسته کې د غور ولایت په بېلابېلو ساحو کې د غصب شويو ځمکو اړوند یو شمېر نورې دوسیې هم بررسي شوې او په اړه یې لازم تصاميم ونيول شول.
