په بلخ ولایت کې د څه باندې ۲۳ زره جریبه ځمکې بررسي کېدل
د بلخ ولایت د ځمکو د غصب د مخنیوي د تخنیکي هیئت ناسته د ذوالقعدې د میاشتې په ۱۰ مه نېټه د یکشنبې په ورځ د دغه هیئت د رئیس او غړو په حضور سره جوړه شوه.
د تخنیکي هيئت په ياده ناسته کې، د مزار شریف ښار د هاشمي نياز استوګنيزې پروژې ۴۰۰ جریبه ځمکې دوسیه، د کشنده ولسوالۍ خاک سفيد ساحه کې ۸۰۰ جريبه ځمکې دوسیه، د ترکمن علي خاني استوګنیز ښارګوټي د ۵۰۰ جریبه ځمکې دوسیې ترڅنګ یو شمېر د ځمکو اړوند نورې دوسیې هم تر بحث او بررسي لاندې ونيول شوې او پرېکړه وشوه چې د یادو ځمکو دوسیې دې بشپړې شي او په راتلونکې ناسته کې دې وړاندې شي.
همداراز په ياده ناسته کې د بلخ ولایت په شولګرې ولسوالۍ کې د دعوا لاندې ځمکو د یو شمېر دوسیو په اړه هم بحث وشو.
