په ارزګان ولایت کې څه باندې د ۵۰۰ جریبه امارتي ځمکې استرداد
د ارزګان ولایت د ځمکو د غصب د مخنیوي د تخنیکي هیئت ناسته د ربیع الثاني د میاشتې په ۲۲ نېټې د دوشنبې په ورځ د یاد هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې د سهنانو په ساحې کې د ۸۰۰ جریبه ځمکې په تړاو چې د تخنیکي هیئت له لوري امارتي تثبیت او تشخیص شوې، بحث او د نظرونو تبادله ترسره شوه او یاد هیئت د دغې ساحې وکیلانو ته د اسلامي امارت د تېرې دورې پریکړه او د ځمکو د غصب د مخنیوي کمېسیون پریکړه بیان کړه او هغوی لپاره يې څلور ورځې وخت ورکړ ترڅو یادې امارتي ځمکې اسلامي امارت ته تسلیم کړي.
دغه راز یاد هیئت د ۵۰۰ جریبه غصب شوې ځمکې ساحې ته چې د یاد ولایت په مرکز کې د ارزګان پوهنتون لپاره ځانګړې شوې وه، ولاړ او د ځمکو د غصب د مخنیوي کمېسیون د لارښوونې په اساس، یاده شوې ۵۰۰ جریبه ځمکه له غاصبینو څخه استرداد کړه او د دغه ولایت د پوهنتون ادارې ته یې تسلیم کړه.
