د کابل په ښار کې د ۱۰ اتحاديو، شورا او خیریه بنسټونو د غیرقانوني فعالیت مخنیوي وشو
د عدلیې وزارت د ټولنو او ټولنیزو بنسټونو د چارو د ریاست نظارتي هیئت په کابل ښار کې ۹ اتحادیې او ۱۳ خیریه بنسټونه بررسي او نظارت کړل.
یاد شوي هیئت د دغې بررسۍ په ترڅ کې ۵ خیریه بنسټونه، ۴ اتحادیې او ۱ شورا چې په غیرقانوني ډول جوړ شوي او په خپل سر ډول یې فعالیت ترسره کاوه، وپېژندل او د هغوی د غیرقانوني فعالیت مخنیوی یې وکړ او له هغوی څخه یې ژمنه واخیسته.
هیئت د یادو اتحادیو او خیریه بنسټونو متصدیانو ته توصیه وکړه چې خپلې اتحادیې او خیریه بنسټونه رسمي کړي او هغو لپاره جواز ترلاسه کړي او په راتلونکي کې له غیرقانوني فعالیت څخه ډډه وکړي.
د عدلیې وزارت د ټولنو او د ټولنیزو بنسټونو د چارو د ریاست نظارتي هیئت په دوامداره توګه د اتحادیو او خیریه بنسټونو له فعالیت څخه بررسي او نظارت ترسره کوي ترڅو د هغو د غیرقانوني فعالیت مخنیوی وکړي.
