د کابل ولایت د غصب شوو ځمکو د بررسۍ کار د ملاتره خیل له ښارګوټي څخه پیلېږي
د کابل، ننګرهار او زابل ولایتونو د ځمکي د غصب د مخنیوي او د غصب شوو ځمکو د تشخیص او تثبیت تخنیکي هیئتونو چې اوس يې پر فعالیت پیل کړی په دوو تېرو ورځو کې يې خپل غونډې او عملي کارونه پیل کړي.
د کابل ولایت د ځمکې د غصب د مخنیوي تخنیکي هیئت ناسته د سه شنبې په ورځ ددغه ولایت د مقام په تالار کې د یاد هیئت د رییس او غړو په حضور سره جوړه شوه.
په دغې ناسته کې له هر اړخیز بحث څخه وروسته، کاري پلان ترتیب شو او تخنیکي ټیم له مسلکي غړو څخه وټاکل شو ترڅو د هغوی د نظر لاندې د غصب شوو ځمکو کمیت او کیفیت څرګند شي. دغه راز د غصب شوو ځمکو د تشخیص او تثبیت له پاره یو جدول تیار شو ترڅو په ډاګه شي چې د کابل ولایت په ښارونو او ولسوالیو کې څومره ځمکه غصب شوې ده.
په دغې ناسته کې پریکړه وشوه چې د کابل ولایت د غصب شوو ځمکو بررسي د ملاتره خیل له ښارګوټي څخه پیل شي.
د ننګرهار ولایت د ځمکو د غصب د مخنیوي د تخنیکي هیئت غونډه ددغه هیئت د رییس او غړو په حضور سره جوړه شوه.
په دغې غونډه کې د جلال اباد زوړ ښار په سیمو کې د غصب شوو ځمکو، د کوټ ولسوالۍ او هسکې میني ترمنځ د غصب شوو ځمکو، درونټه کې د بريښنا شرکت د غصب شوي ملکیتونو د بررسۍ او راستنولو له پاره بېلابیل هیئتونه وټاکل شول.
دغه راز ددغه ښار په اوومې ناحیې کې د غصب شوو ځمکو په اړه ښاروالۍ ته دنده وسپارل شوه چې په راتلونکې ناسته کې بشپړ معلومات راټول او وړاندې کړي او د ننګرهار د نفت او ګازو امریت څخه ددغې ادارې د غصب شوو ځمکو په اړه سندونه وغوښتل شول.
دغه راز ددغه ولایت د حج او اوقافو رییس ته دنده وسپارل شوه چې ددغې اوونۍ د جمعې لمانځه له پاره علماوو ته د عامه شتمنیو د غصب د مخنیوي په اړه موضوعات وټاکي ترڅو په دغې برخه کې خلکو ته پوهاوی ورکړي. د کادستر مسوول ته هم لارښوونه وشوه چې د امارتي ځمکو شمېر دې راټول او هیئت ته یې وړاندې کړي ترڅو له هغو سره سم اجراات ترسره شي.
د زابل ولایت د ځمکي د غصب د مخنیوي د تخنیکي هیئت ناسته ددغه ولایت د حج او اوقافو په ریاست کې جوړه شوه.
دغه ناسته د کرنې ریاست له لوري د حج او اوقافو ریاست ته د هدیرې له پاره د ۶۰ جریبه ځمکې د سپارلو په موخه جوړه شوې وه. په دغې ناسته کې، هیئت د یادې ځمکې حدود مشخص کړل ترڅو له شخصي استفادو څخه يې مخینوی وشي.
