د پکتیا ولایت د ځمکې د غصب د مخنیوي تخنیکي هيئت د ناستې جوړیدل
د پکتیا ولایت د ځمکې د غصب د مخنیوي تخنیکي هیئت ناسته د ربیع الثاني میاشت په ۲۴ نېټه د شنبې په ورځ د کرنې، اوبو لګولو او مالدارۍ رییس او ددغه هیئت رییس مولوي عبدالروف سعید په مشرۍ او د عدلیې رییس مولوي محمد رییس محمدي او ددغه هیئت د نورو غړو په حضور کې د پکتیا ولایت د کرنې په ریاست کې جوړه شوه.
په دغې ناسته کې ښاغلي سعید د موضوع په اړه خبرې وکړې او د هغو ننګونو او ستونزو په اړه يې وضاحت ورکړ چې دغه هیئت به د کار په لړ کې ورسره مخامخ شي.
ښاغلي سعید وویل چې یاد هیئت ته د اسلامي امارت د رهبرۍ مقام له لوري یو ډېر دروند مسوولیت سپارل شوی او ښه ډول ددغه مسوولیت د پرمخ وړلو په منظور د چارو په سرته رسولو کې اخلاص او صداقت ته اړتیا ده. نوموړي د یاد هیئت له غړو څخه وغوښتل چې دغه مسوولیت په ګډه او په ډېر ښه ډول ترسره کړي.
په یاده ناسته کې ددغه هیئت غړو د موضوع په اړه بحث وکړ او د چارو لا ښه سرته رسولو په منظور يې خپل نظرونه سره شریک کړل.
په دغې ناسته کې په ښه توګه د چارو سرته رسولو په منظور له هر اړخیز بحث څخه وروسته یو لړ پریکړې او لازم تصامیم ونیول شول.
