د پروان ولایت د عدليې نوی رئیس وپيژندل شو.
حشمت الله حشم چې په وروستیو کې د پروان ولایت د عدليې رئیس په توګه ټاکل شوی دی، د عدليې وزارت د ټولنیزو چارو معینې او د پروان والي له خوا د دغه ریاست کارکوونکو ته وپېژندل شو.
د عدليې وزارت د ټولنیزو چارو معینې ډاکټرې زکيې عادلي د پنجشنبې ورځې د غبرګولي په ۱۳ مه د ښاغلی حشم د پېژندنې پرمهال هغه ته د نوي منصب د مبارکۍ ترڅنګ، زیاته کړه چې دغه پرېکړه د وزارت د رهبرۍ د لزوم دید پربنسټ نیول شوی دی.
هغې همداراز د محکمو د پرېکړو د پلي کولو لپاره د پروان د عدليې له ریاست سره د ولایت د مقام د لازیاتو همکاریو غوښتونکې شوه او ويې ویل چې په جینوا کنفرانس کې د حکومت ژمنې ته په کتو سره، اړتیا ده د عدليې ریاست د اړوندو ادارو ترمنځ زیاته همغږي صورت ومومي.
د پروان والي فضل الدین عیار د دې ولایت د عدليې له پخواني رئیس څخه د قدردانۍ ترڅنګ، ښاغلی حشم ته د نوي منصب مبارکي وویله. هغه همداراز د عدالت په تامین، د قانون په پلي کولو او د سیمه ییزو ادارو ترمنځ د همغږۍ په پیاوړتیا ټینګار وکړ او د پروان له عدليې ریاست سره د ولایت د مقام له هر اړخيزې همکارۍ څخه ډاډ ورکړ.
