په ننګرهار ولایت کې د معاملاتو لارښوونې له یو شمېر دفترونو څخه نظارت ترسره شو
د ننګرهار ولایت د عدلیې ریاست نظارتي پلاوي د ذیالحجې د میاشتې په ۲۴مه نېټه د شنبې په ورځ د دغه ولایت د مرکز، جلالآباد ښار په اتمه ناحيه کې د معاملاتو لارښوونې له ۸ دفترونو څخه نظارت ترسره کړ او د هغو فعاليتونه یې بررسي کړل.
د دغه نظارت په ترڅ کې نظارتي پلاوي د یادو دفترونو د فعاليت جوازونه، د پېر او پلور قانونيتوب، د رسمي سټو کارونه او یو شمېر نور اړين اسناد بررسي کړل چې، په ترڅ کې یې یو شمېر نيمګړتياوې هم مشخصې کړې.
نظارتي پلاوي د دفترو مسؤولينو سره د يادو نمګړتياو د لرې کولو او د کاري چارو ښه پرمخ وړلو په موخه لازمي توصیې شرېکې کړې او همدارنګه یې له هغوی څخه وغوښتل ترڅو د مخکنیو سټو له استفادې څخه ډډه وکړي او پرځای يې له نويو سټو څخه ګټه پورته شي.
د عدلیې وزارت په مرکز او د عدلیې ریاستونه په ولایتونو کې، په دوامداره توګه له اړوندو برخو څخه نظارت او بررسي ترسره کوي تر څو د غير قانوني فعاليتونو مخه ونيول شي.
