د عدلیې وزارت د رهبرۍ شوری د غونډې جوړېدل
د عدليې وزارت د سرپرست؛ شیخ الحدیث مولوي عبدالحکيم "شرعي" په مشرۍ د عدلیې وزارت د رهبرۍ شوری غونډه، نن دوشنبه د ۱۴۴۶ هـ.ق کال د جمادي الثاني میاشتې په ۱۴ نېټه د دې وزارت په مقر کې جوړه شوه.
په دې غونډه کې د دې وزارت مسلکي معين؛ شيخ الحديث مولوي عبدالکريم "حيدر"، مالي او اداري معين مولوي عبدالغني "فايق"، مرکزي رئیسانو او نورو مسئولینو ګډون درلود.
د رهبرۍ شوری غونډه د قران کريم د څو مبارکو آيتونو په تلاوت سره پيل او وروسته د عدلیې وزارت سرپرست شیخ الحدیث مولوي عبدالحکيم "شرعي" وينا وکړه او وې ویل: د افغانستان اسلامي امارت د ډېرو قربانيو په ورکولو سره رامنځته شوی دی او په دې نظام کې د خلکو لپاره امنيت، سکون، عزت او د ښه ژوند کولو زمینه برابره شوې ده، له دې امله پر موږ ټولو باندې لازمه ده چې د الله تعالی شکر اداء او د نظام د استحکام او پایښت لپاره په پوره اخلاص، خدمت وکړو.
همداراز، په دې غونډه کې د یو شمېر نورو مهمو موضوعاتو په اړه بحث او په هکله یې لازم تصمیمونه ونیول شول.
یاده غونډه، د خیر او برکت په دعا پای ته ورسېدله.
