د بلخ ولایت د ځمکو د غصب د مخنیوي د تخنیکي هیئت ناسته جوړه شوه
د بلخ ولایت د ځمکو د غصب د مخنیوي د تخنیکي هیئت ناسته د شوال میاشت په ۲۴ نېټه د یکشنبې په ورځ د دغه هیئت د رئیس او غړو په حضور سره جوړه شوه او د دوسیو، لیکوونو او د ځمکو د غصب د مخنیوي او د غصب شویو ځمکو د استرداد په برخه کې د بېلابېلو موضوعاتو په اړه په کې بحث او خبرې وشوې.
یاد هیئت په چمتال ولسوالۍ کې د یو شخص تر اجارې لاندې د ۵۰۰ جریبه ځمکې په اړه پریکړه وکړه چې د کرنې ریاست، د کادستر ټیم او اړونده ولسوالۍ ساحه نښاني کړي او هغه اصلي اجاره دار ته تسلیم کړي او چاپېره ځمکه یې هم په اجاره ورکړي.
دغه راز هیئت پریکړه وکړه چې د بلخ ولسوالۍ د ورشو کلي د اوسیدونکو ځمکې د ۱۰۰۰ جریبه امارتي ځمکې د تفکیک په منظور راتلونکې ورځ دغې ولسوالۍ ته سفر وکړي.
یاد هیئت یو شمېر عریضې او موضوعات بررسي کړل او پریکړه یې وکړه چې له موضوع سره سم له عارضینو، اړوندو ادارو او مقابل لورو څخه معلومات وغوښتل شي او ځیني نور موضوعات هم تعقیب شي. دغه راز له هیئت سره د موجودو سندونو په اړه پریکړه وشوه چې یاد سندونه په اړوندو ساحو کې تطبیق شي.
د سخي آباد او فیض آباد کارتو مسوولین او استازي په سخي آباد کې د شنې ساحې د ۳۰ جریبه ځمکې د استرداد په تړاو د هغوی له سندونو سره جلب شول.