د بشري حقونو د نړیوال کنوانسیونونو سپارښتونو تعقیبي ډیټابیس د دولتي ادارو سره شریکه شوه
د افغانستان د اسلامي جمهوریت د عدلیې وزارت د بشري حقونو د نړیوال کنوانسیونونو سپارښتونو تعقیبي ډیټابیس د دولتي ادارو له استازو سره شریک کړ.
ډیټابیس د عدلیې وزارت لخوا د ملګرو ملتونو د پراختیايي پروګرام (UNDP) په همکارۍ د څارنې سیستم معیاري کولو او د بشري حقونو په برخه کې د ملګرو ملتونو د وړاندیزونو پلي کولو لپاره چمتو شوی او د سه شنبې په ورځ د یوې ناستې په ترڅ کې د ۱۰ دولتي ادارو له استازو سره شریک شو.
د بشري حقونو کنوانسیون تعقیبي ډیټابیس دولتي ادارو سره مرسته کوي تر څو د بشر حقونو نړیوالو کنوانسیونونو سپارښتونود اړوند خپل راپورونه د عدلیې وزارت سره شریک کړي ترڅو د رسمي چینلونو له لارې ملګرو ملتونو سره شریک شي.
په دې ناسته کې د بشري حقونو د نړیوالې بیاکتنې (UPR) وړاندیزونو پلي کولو په اړه د منځ مهاله راپور په اړه هم بحث وشو، چې د دولتي ادارو سره په همکارۍ د عدلیې وزارت لخوا چمتو شوی. راپور به ډیر ژر د بهرنیو چارو وزارت لخوا د ملګرو ملتونو د څارنې کمیټې ته وسپارل شي.
د ښځو پر وړاندې د تاوتریخوالي د ټولو ډولونو د لمنځه وړلو په هکله د بشر حقونو نړیوال کنوانسیون د نظارت کمیټې د وړاندیزونو لپاره د ملي عمل پلان لومړنۍ مسوده هم د سه شنبې ورځې په غونډه کې د دولتي ادارو له استازو سره د دې پلان د بشري حقونو د څارنیزو فعالیتونو د څانګو ټاکلو لپاره شریکه شوه.
