د کمېسیون له خوا د ځمکو د غصب د مخنیوي قانون د یوې مادې په اړه د علماوو د شورا د نظریاتو توحید
د ځمکو د غصب د مخنیوي او د غصب شویو ځمکو د استرداد کمېسیون د یوې ناستې په ترڅ کې د ځمکو د غصب د مخنیوي قانون د څلور فقرو په اړه د بېلابېلو ولایتونو د علماوو د شورا نظریات بحث او بررسۍ لاندې ونیول او توحید یې کړل.
دا ناسته چې د شعبان د میاشتې په ۲۴ نېټه د چهارشنبې په ورځ د عدلیې وزارت د سرپرست او د یاد کمېسیون رئیس شیخ الحدیث مولوي عبدالحکیم شرعي په مشرۍ او د کور او ښار جوړولو د وزارت سرپرست مولوي حمد الله نعماني، د کرنې، اوبو لګولو او د مالدارۍ وزارت سرپرست مولوي عطاء الله عمري، د سرحدونو، قومونو او د قبایلو د وزارت سرپرست ملا نور الله نوري، د چارو د ادارې عمومي رئیس شیخ نورالحق انور، د سترې محکمې استازی شیخ عبدالصمد حقاني، د امارت د قضایاوو عمومي رئیس او د یاد کمېسیون سکرتر مولوي احسان الله وثیق او د عدلیې وزارت د قوانینو د طرحې پروژې د یو شمېر علماوو په ګډون سره، د عدلیې وزارت په مقر کې جوړه شوه.
په یاده ناسته کې د ځمکو د غصب د مخنیوي کمېسیون غړو، د ځمکو د غصب د مخنیوي قانون د دریمې مادې د ځینو فقرو په اړه بحث وکړ او په اړه یې د هېواد د ۳۴ ولایتونو د علماوو د شوراګانو نظریات یې توحید کړل.
د هېواد د ۳۴ ولایتونو د علماوو شوراګانو د امیرالمومنین حفظه الله تعالی د لارښوونې په اساس د ځمکو د غصب د مخنیوي قانون د دریمې مادې د څلورو فقرو په اړه چې د امارتي ځمکو څرنګوالي پورې اړه لري خپل نظریات یې وړاندې کړي وو.
دغه راز په دې ناسته کې د یادو علماوو نظریات د کادستري ټوټو د اعتبار په اړه چې په تېرو حکومتونو کې تعیین شوي هم بحث لاندې ونیول شوو او د کمېسیون غړو او علماوو یاد شوي نظریات توحید کړل.
