په کندز ولایت کې د ۸۰۰ جریبه امارتي ځمکې تثبیت او تشخیص
د کندز ولایت د ځمکو د غصب د مخنیوي د تخنیکي هیئت رئیس او غړو د جمادي الاول میاشتې په ۲۷ نېټې د دوشنبې په ورځ د یاد ولایت د چهاردرې ولسوالۍ حسن آباد ساحې ته سفر وکړ او په دغې ساحه کې امارتي ځمکې وکتلې او بررسې کړې.
تخنیکي هیئت د یادې ولسوالۍ سیمه ییزو مسؤولینو په ملتیا د حسن آباد ساحې له استازو او ځمکه والو سره وکتل او د ځمکه والۍ سندونو او د یادې ساحې د تصرف څرنګوالي په اړه يې معلومات وغوښتل.
ځایي خلکو د یادې ساحې د ۴۲۰ جریبه ځمکې د مالکیت ادعا درلودله او د هغو په تصرف کې د ساحې پاتې برخو په امارتي والي اعتراف وکړ.
تخنیکي هیئت په یاده ساحه کې کابو ۸۰۰ جریبه امارتي ځمکه تثبیت او تشخیص کړه او د دغه هیئت سکرتریت ته یې لارښوونه وکړه چې د یادې ساحې د اوسیدونکو د سندونو د صحت او سقم په تړاو له ذیربطو مراجعو څخه معلومات راټول کړي او د څېړنو له بشپړولو، کوردینات اخیستلو، سکیچ او پر ساحه باندې د متصرفینو د سندونو له تطبیق وروسته د هغې دوسیه مرکز ته واستوي.
