یو شمېر بنسټونو د کورنۍ د قانون د طرحې په باره کې خپل وړاندیزونه د عدليې له وزارت سره شریک کړل
د یو شمېر مؤسسو او د مدني ټولنې د بنسټونو مسؤلانو د عدليې له مالي او اداري معین ګل محمد ګلزي سره په کتنه کې د کورنۍ د قانون د طرحې په باره کې خبرې وکړې او د دې قانون په باره کې خپل وړاندیزونه يې له هغه سره شریک کړل.
په دې کتنه کې چې د روان کال د لړم په میاشتې په ۲۵ نېټه، د یکشنبې په ورځ وشوه د مدني بنسټونو او مؤسسو استازو د کورنۍ د اهمیت په باره کې خبرې وکړې او د عدليې وزارت له کړنو په تېره بیا د کورنۍ د قانون د طرحې په برخه کې د قدردانۍ په ترڅ کې د دې طرحې په باره کې خپلې نظريې او وړاندیزونه وړاندې کړل.
د عدليې وزارت مالي او اداري معین هم ټینګار وکړ چې په هېواد کې د حکومتوالۍ سیستم پرانستې دی او د عدليې وزارت د تقنیني سندونو د ښيې بډاینې په منظور د مدني ټولنې د ټولو بنسټونو د نظریو او وړاندیزونو هرکلی کوي .
د عدليې وزارت د کورنۍ د قانون د طرحې په اړوندو وزارتونو او دولتي ادارو او د افغانستان د عالمانو شورا د لیکلو نظریو غوښتنه هم کړې ده.
ټاکل شوې ده د دې قانون طرحه د طرحه شوو نظریو په پام کې نیولو سره ډیر ژر وروستنۍ شي او د پړاوونو د تېرولو لپاره د کابینې د قوانینو کمېټې ته ولېږله شي.
