د عدلیې وزیر د رسمي جریدو او نورو رسمي سندونو د چاپ له بهیر څخه لیدنه وکړه
د اسلامي امارت د عدلیې وزیر، محترم شیخ الحدیث مولوي عبدالحکیم شرعي د شوال د میاشتې په ۱۱مه نېټه د پنجشنبې په ورځ د بهیر ګروپ په شرکت کې د رسمي جریدو، تقنیني سندونو او درسي نصاب د چاپ له بهیر څخه لیدنه وکړه.
د عدلیې وزیر د دې لیدنې په ترڅ کې د یاد شرکت له مسؤولینو سره هم خبرې وکړې او د هغوی د فعالیتونو او خدمتونو د ستاینې ترڅنګ یې د کورنیو تولیداتو د کیفیت پر لوړولو ټینګار وکړ او زیاته یې کړه چې باکیفیته تولیدات د کورني صنعت د پیاوړتیا، د هېواد د اقتصادي ودې او د بیکارۍ د کمښت لامل کېږي.
نوموړي د یاد شرکت مسؤولینو ته توصیه وکړه چې د چاپ کیفیت او د وخت پابندۍ ته ځانګړې پاملرنه وکړي تر څو د هغوی تولیدات د هېواد د تعلیمي او حقوقي اړتیاوو ځواب ویونکي وي.
محترم شیخ الحدیث مولوي عبدالحکیم شرعي همدارنګه د خلکو له لوري د کورنیو تولیداتو کارول مهم وبلل او ویې ویل چې اسلامي امارت هم صنعتکارانو لپاره د لازمو آسانتیاوو د برابرولو، له دې جملې د ځمکې ځانګړي کولو په برخه کې، لازم اقدامات ترسره کړي دي.
د اسلامي امارت عدلیې وزارت د بهیر ګروپ له شرکت سره د رسمي جریدو او نورو نشراتي سندونو د چاپ قرارداد کړی دی او یادې جریدې په منظم ډول چاپ او خپرېږي.
