مطبوعاتي اعلامیه
پنجشنبې، د ۱۳۹۸ د سلواغې لسمه نېټه
کابل – افغانستان: د ا.ا.ج عدلیې وزارت د دغه وزارت له قوله په هېواد کې د بندیانو د شمېر او په زندانونو کې د هغو بندیانو په اړه چې پرته له محاکمې په زندانونو کې بندیان دي نشر شوی خبر ردوي او د ویاند شخصی نظر ګڼي.
یو شمېر رسنیو تېره ورځ د مسلکي عدالت غوښتنې ملي کنفرانس د رسنیز پوښښ پر مهال او په افغانستان کې د عدلي او قضايي ارګانونو سره په همغږۍ د عدلیې وزارت له قوله ویلي چې، یاد وزارت وايي اوس مهال ۳۲ زره بندیان د هېواد په بندخونو کې دي او د ۱۰ زرو په شمېر نور پرته له محاکمې د هېواد په زندانونو کې بندیان دي.
د یادونې وړ دی چې، د ۱۳۹۰ هـ.ش کال را پدېخوا د افغانستان بندخونو مسؤلیت د عدلیې له وزارت څخه د افغانستان اسلامي جمهوریت د کورنیو چارو وزارت ته انتقال شوی. د عدلیې وزارت په زندانونو کې د بېوزلو مظنونینو او تورنو سره د حقوقي مرستو مسؤلیت پر غاړه لري.
په زندانونو کې د بندیانو دقیق شمېر، د هغو تورنو چې تر اوسه محاکمه شوي نه دي او ورته نورو مواردو په اړه د اطلاعاتو خپرول د عدلیې وزارت پورې اړه نه لري، نو پر دې اساس دغه وزارت د بندیانو د شمېر او د هغو بندیانو په اړه چې ګواکې تر اوسه محاکمه شوي نه دي او په بندخونو کې ساتل کېږي، د ویاند شخصي نظر ګڼي.
د یادونې وړ دی چې، د بندخونو دقیق شمېر او نور اړوند اطلاعات تر اوسه د افغانستان اسلامي جمهوریت د کورنیو چارو وزارت پورې اړه لري.
