په پروان ولايت کې ۲۱ موټر پلورنځيو څخه نظارت ترسره شو
د پروان ولایت د عدلیې رياست مؤظف پلاوي، د صفر المظفر د مياشتې په ۵مه نېټه د دوشنبې په ورځ د ياد ولایت په مرکز، چاریکار ښار کې له ۲۱ موټر پلورنځيو څخه نظارت ترسره کړ او د هغو فعالیتونه یې بررسي کړل.
مؤظف نظارتي پلاوي د فعالیت جوازونه، د پېر او پلور قانونيتوب، رسمي سټې، مالیاتي اسناد، د موټر پلورنځیو په دفترونو کې د متصدیانو شتون او نور اړین موارد بررسي کړل.
پلاوي د یاد نظارت په ترڅ کې، د موټرپلورنځیو ځینې کاري نیمګړتیاوې او ستونزې مشخصې کړې او د یادو ستونزو د اصلاح او د کاري چارو د پرمخ وړلو کې د ښهوالي په موخه د هغو متصدیانو ته لازمې توصیې وکړې. د یادو موټرپلورنځیو متصدیانو هم ژمنه وکړه چې خپلې کاري نیمګړتیاوې به لرې کوي.
د پروان ولایت د عدلیې رياست په یاد ولایت کې په دوامداره توګه له اړوندو برخو څخه نظارت ترسره کوي تر څو د غير قانوني فعالیتونو مخنيوی وشي.
