په هرات ولایت کې د معاملاتو لارښوونې له ۲۱ دفترونو څخه نظارت ترسره شو
د هرات ولایت د عدلیې رياست نظارتي پلاوي د روژې د مياشتې په ۱۵مه نېټه د چهارشنبې په ورځ، په هرات ښار کې د معاملاتو لارښوونې له ۲۱ دفترونو څخه نظارت ترسره کړ او د هغو فعاليتونه یې بررسي کړل.
د یاد نظارت په ترڅ کې د دغو دفترونو د فعاليت جوازونه، رسمي سټې، لوحې او یو شمېر نور اړين اسناد بررسي شول چې په ترڅ کې یې یو دفتر د یو شمېر غير قانوني فعاليتونو له امله وتړل شو.
نظارتي پلاوي د معاملاتو لارښوونې د یادو دفترونو په فعاليتونو کې یو شمېر ستونزې او نيمګړتياوې هم مشخصې کړې او د ستونزو د لرې کولو او د کاري چارو ښه پر مخ وړلو په موخه یې د یادو دفترونو متصديانو ته لازمې توصیې وکړې.
د هرات د عدلیې رياست په دوامداره توګه له اړوندو برخو څخه نظارت ترسره کوي ترڅو د غيرقانوني فعاليتونو مخنيوی وشي.
