د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ د عدلیې وزیر، د کمېسیون رئیس او د اراضۍ او د امارتي ځمکو د استرداد وزارت وارسي کوونکی محترم شیخ الحدیث مولوي عبدالحکیم شرعي په مشرۍ په یوې ناسته کې د هېواد په څلورو ولایتونو کې د څه باندې ۸ زره جریبو ځمکو موضوعات تر بحث او بررسۍ لاندې ونیول.
په دې ناسته کې چې د ربیع الآخر د میاشتې په ۲۰مه نېټه د یکشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي نجیب الله حقاني، د سرحدونو، قومونو او قبایلو وزارت معین محترم مولوي محمد اسماعیل غزنوي، د چارو د ادارې عمومي رئیس محترم شیخ الحدیث مولوي نورالحق انور، د سترې محکمې استازي محترم مولوي محمد حماد، د امارت د قضایاوو عمومي رئیس او د کمېسیون سکرتر محترم احسان الله وثیق او نورو مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون رهبرۍ د کابل ښار په ۱۷ ناحیه کې د نږدې ۷ زره او ۵۰۰ جریبه ځمکې، په هلمند ولایت کې د ۶۲۵ جریبه ځمکې، په زابل ولایت کې د یو مارکېټ او د ننګرهار د کانال اړوند یوې برخې ځمکې موضوعات بررسي کړل او په اړه یې لازم تصامیم ونیول.
دغه راز په یاده ناسته کې له کمېسیون سره د محکمو او نورو ادارو د همکاریو د پياړتیا موضوع، د رسیدګۍ په موخه د هغو ښارګوټو دوسیو ته لومړتیوب ورکول چې منظور شوی پلان لري، په هلمند ولایت کې د میلیونونو جریبو ځمکو سروې لپاره د هیئت د توظیف موضوع او په مزار شریف ښار کې د بلخ ولایت د مقام شاوخوا کورونو موضوع تر بحث او بررسۍ لاندې ونیول شوې.
د ځمکو له غصب څخه د مخنیوي کمېسیون رهبرۍ د یادو شویو ځینو موضوعاتو په اړه لازمې پرېکړې وکړې او د ځینو نورو بررسۍ لپاره یې هیئت توظیف کړ ترڅو د هغو د حل په موخه لازم اقدامات او همغږۍ ترسره شي.
