په غور ولایت کې د کابو ۹ زره جریبه امارتي ځمکې استرداد
د غور ولایت د ځمکو له غصب څخه د مخنیوي تخنیکي هیئت ناسته، د رجب المرجب د مياشتې په ۱۹ مه نېټه، د دوشنبې په ورځ، د یاد هيئت د رئيس او غړو په ګډون جوړه شوه.
په دې ناسته کې د یاد ولایت د مرکز ولسوالۍ اړوند په خاک ملا کلي کې د اته زره نهه سوه څلوېښت (۸۹۴۰) جریبه ځمکې دوسيه تر بحث او بررسۍ لاندې ونيول شوه او د يادې ځمکې د متصرفينو د اعتراف په اساس امارتي تثبیت او تشخیص شوه.
هيئت یاده ځمکه استرداد کړه او پرېکړه يې وکړه چې مشخصات یې د ځمکو په بانک کې ثبت شي.
همدارنګه، په ياده ناسته کې د غور ولایت د بېلابېلو ساحو د غصب شويو ځمکو اړوند یو شمېر نورې دوسیې هم بررسي شوې او په اړه یې لازم تصامیم ونیول شول.
