په کابل او څو نورو ولایتونو کې د څه باندې ۱۷ زره جریبه ځمکې په اړه د ځمکو له غصب څخه د مخنیوي کمېسیون د رهبرۍ ناسته
د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته د ربیعالثاني د میاشتې په ۱۷ نېټه د یکشنبې په ورځ د عدلیې وزیر او د یاد کمېسیون رئیس، محترم شیخ الحدیث مولوي عبدالحکیم شرعي په مشرۍ د عدلیې وزارت په مقر کې جوړه شوه او د څه باندې ۱۷ زره جریبه ځمکو دوسیې پهکې بررسي شوې.
په دې ناسته کې د کور او ښار جوړلو وزیر محترم مولوي حمدالله نعماني، د چارو ادارې عمومي رئیس محترم شیخ الحدیث مولوي نورالحق انور، د سرحدونو، قومونو او قبایلو وزارت معین محترم مولوي محمد اسماعیل غزنوي، د سترې محکمې استازي محترم شیخ عبدالصمد حقاني او د امارت د قضایاوو عمومي رئیس او د یاد کمېسیون سکرتر محترم مولوي احسان الله وثیق او نور مسؤولینو ګډون درلود.
په دې ناسته کې د کابل د چهارآسیاب او موسهي ولسوالیو د ځمکو، په چهار آسیاب کې د رفاه ښارګوټي، په شکردرې ولسوالۍ او ۱۷مه ناحیه کې د سلګونو جریبو ځمکو د تصفیې په اړه بحث وشو. دغه راز کمېسیون په بلخ، جوزجان، کندز، میدان وردګ، زابل او پکتیکا ولایتونو کې د زرګونو جریبو ځمکو دوسیې بررسي کړې.
په یاده ناسته کې د ځمکو له غصب څخه د مخنیوي کمېسیون په یادو ولایتونو کې د څه باندې اولسزره (۱۷۰۰۰) جریبه ځمکې له مجموع څخه د هغې نږدې پنځلسزره (۱۵۰۰۰) جریبه امارتي تثبیت کړه. دغه راز یو شمېر دوسیې د امارتي غصب شویو ځمکو قضیو ته د رسیدګۍ اختصاصي محکمې ته وسپارل شوې او پاتې نورو دوسیو په اړه هم لازم تصامیم ونیول شول.
