په غور ولایت کې د نږدې ۱۲۰۰ جریبه امارتي ځمکې تثبیت
د غور ولایت د ځمکو د غصب د مخنیوي تخنیکي هیئت ناسته، د صفر المظفر د مياشتې په ۱۵ مه نېټه د دوشنبې په ورځ، د یاد هيئت د رئيس او غړو په ګډون سره جوړه شوه.
د تخنيکي هئيت په دې ناسته کې د یاد ولایت د مرکز اړوند په خواجه لشکر ګاه ساحه کې د ۱۱۹۱ جریبه ځمکې موضوع تر بحث او بررسۍ لاندې ونیول شوه او په پایله کې دا ځمکه امارتي تثبیت او تشخیص شوه. هیئت پرېکړه وکړه چې د یادې ځمکې دوسیه د وروستۍ پرېکړې په موخه مرکزي کمېسيون ته واستول شي.
همدارنګه د تخنيکي هيئت په دې ناسته کې د یاد ولایت په بېلابېلو ساحو کې د غصب شويو ځمکو اړوند دوسیې هم تر بحث او بررسۍ لاندې ونيول شوې او پرېکړه وشوه چې دوسیې یې بشپړې او په راتلونکې ناسته کې دې وړاندې شي.
