د عدلیې وزارت د انسجام رياست عمومي رئيس: خيريه بنسټونه او اتحادیې دې په خپلو چارو کې شفافیت ته پام وکړي
د عدلیې وزارت د انسجام عمومي رئيس مولوي عبدالصمد عمري، د ننګرهار ولایت عدلیې رياست او د یاد ولایت خيريه بنسټونو او اتحاديو ترمنځ د همغږۍ په ناسته کې وویل چې، خيريه بنسټونه او اتحادیې دې په خپلو چارو کې شفافیت او سلسله مراتب ته پام وکړي.
په دغې ناسته کې چې، د ذوالحجې د مياشتې په ۱۶ مه نېټه د یکشنبې په ورځ د ننګرهار ولایت د عدلیې رياست په مقر کې جوړه شوه، د عدلیې وزارت د انسجام عمومي رئيس مولوي عبدالصمد عمري، د ننګرهار ولایت عدلیې رئيس مولوي فاتح الله فاتح او د خيريه بنسټونو او اتحاديو استازو ګډون درلود.
د عدلیې وزارت د انسجام عمومي رئيس د خپلو خبرو په ترڅ کې د خيريه بنسټونو او اتحاديو استازو ته وویل چې، خپلې ټولې کړنې د قانون مطابق او د عدلیې ریاست په همغږۍ ترسره کړي او په سمه توګه مستحقينو او بېوزلو خلکو ته مرستې ورسوي.
په یاده ناسته کې د خيريه بنسټونو او اتحاديو استازو د همغږۍ ناستو جوړېدل اړین وبلل او خپل وړاندیزونه او کاري ستونزې یې هم شريکې کړې چې د عدلیې وزارت د انسجام عمومي رئيس د ستونزو حل کېدو په هکله هغوی ته ډاډ ورکړ.
