په پکتیکا ولایت کې د مدافع وکیلانو ستونزو ته د رسیدګۍ په موخه د ناستې جوړیدل
د پکتیکا ولایت، عدلیې ریاست د جمادي الثاني د میاشتې په ۱۹ نېټه د سه شنبې په ورځ د یاد ولایت د مدافع وکیلانو ستونزو ته د رسیدګۍ په موخه یوه ناسته جوړه کړه. دغه ناسته دعدلیې رئیس مولوي حیات الله آمین په مشرۍ او د یاد ولایت د مدافع وکیلانو او دعدلیې ریاست د اړوندو کارمندانو په ګډون جوړه شوه.
د عدلیې رئیس په یاده ناسته کې وویل چې مستحق ته د حق ورکول، د عدالت ترټولو جامع تعریف دی او زیاته یې کړه چې عدالت ایجاب کوي چې عادي وګړي په جزايي او د عامه حقوقو په قضیو کې مدافع وکیل ولري.
نوموړي د دفاع وکالت سپیڅلی مسلک وباله او ټینګار یې وکړ چې دغه دنده باید په بشپړ ایماندارۍ او صداقت سره ترسره شي.
له بلېخوا په یاده ناسته کې مدافع وکیلانو خپلې کاري ستونزې بیان کړې او د عدلیې رئیس ژمنه وکړه چې دغه ستونزې به له ذیصلاح ارګانونو سره شریکي کړې.
