د پکتیا ولایت محبوسینو لپاره د حقوقي پوهاوي ورکولو برنامه جوړول
د پکتیا ولایت د عدلیې ریاست دحقوقي مساعدتونو آمریت د جمادي الاول میاشتې په ۲۷ نېټې د دوشنبې په ورځ د یاد ولایت په زندان کې محبوسینو لپاره د حقوقي پوهاوي ورکولو برنامه جوړه کړه.
لومړی، د عدلیې ریاست د حقوقي مساعدتونو آمر مولوي امین الله حسینی او د یاد ریاست د عامه پوهاوي مدیر د پکتیا ولایت د زندان له رئیس مولوي سهیل سعید او د دغه زندان له نورو مسؤولینو سره وکتل او له هغوی سره یې د یاد ولایت محبوسینو لپاره د حقوقي پوهاوي ورکولو برنامې جوړلو موضوع شریکه کړه.
د پکتیا ولایت د زندان رئیس د یاد ولایت د عدلیې ریاست د هڅو ستاینه او قدرداني وکړه او د یاد ولایت د زندان محبوسینو لپاره د دغه راز برنامو په جوړولو کې خپل همکاري اعلام کړه.
وروسته د پکتیا ولایت د عدلیې ریاست د حقوقي مساعدتونو آمریت د حقوقي پوهاوي ورکولو برنامه د یاد ولایت په زندان کې جوړه کړه او د دغه زندان ۲۰۶ تنو محبوسینو لپاره یې د حقوقي مساعدتونو په تړاو معلومات وړاندې کړل.
