د سرپل ولایت د تخنیکي هیئت د ناستې جوړیدل او د یاد ولایت د مرافعه محکمې له رئیس سره د یاد هیئت کتنه
د سرپل ولایت د ځمکو د غصب د مخنیوي تخنیکي هیئت ناسته د ذوالحجې د میاشتې په ۳ نېټه د چهارشنبې په ورځ د دغه هیئت د رئیس او غړو په حضور سره جوړه شوه او یاد شوي هیئت دوه یمه ورځ د دغه ولایت د مرافعه محکمې له رئیس سره هم د همغږۍ ناسته جوړه کړه.
په دغې ناسته کې، په البدر کوهستانات ولسوالۍ کې ۲۵۴۵۸ جریبه، ۱۷بسوې او ۱۵ بسواسې ځمکې په اړه چې غصب، پېرلو او پلورلو په حال کې وه او هیئت د هغې له غصب څخه مخنیوي کړی او یاده ځمکه رسماً عامه څړځای اعلام کړې وه، بحث وشو.
دغه راز په دغې ناسته کې په ذکه کلي کې د غصب شوې ځمکې په اړه بحث وشو او د هغې د متصرفینو خبرې واوریدل شوې او هیئت د هغې متصرفینو له پاره د خپلو سندونو وړاندې کولو په برخه کې لازمې لارښوونې وکړې. د دغه هیئت جوړ شوي پلان په اړه هم بحث او د نظر تبادله وشوه او دغې برخه کې لازمې لارښوونې صادر شوې.
تخنیکي هیئت، دوه یمه ورځ د دغې ولسوالۍ د مرافعه محکمې له رئیس سره د همغږۍ ناسته هم جوړه کړه او د یو متحدالمال او د امیرالمومنین حفظه الله د ۳۰۱۷ ګڼې حکم په اړه بحث وشو. د مرافعې محکمې رئیس د ځمکو د غصب د مخنیوي په اړه ټینګار وکړ او له تخنیکي هیئت سره د همکارۍ په برخه کې آمادګي اعلام کړه.
