د کنړ ولایت له ځینو ساحو څخه د یاد ولایت د ځمکو د غصب د مخنیوي د تخنیکي هیئت لیدنه
د کنړ ولایت د ځمکو د غصب د مخنیوي د تخنیکي هیئت ناسته د ذوالحجې د میاشتې په ۲ نېټه د سه شنبې په ورځ د دغه هیئت د رئیس او غړو په حضور سره جوړه شوه او هیئت دغه ولایت کې له ځینو ساحو څخه هم لیدنه وکړه.
دغه هیئت د سرکاڼو ولسوالۍ دونهي ساحې ته ولاړ او د یو شخص ملکیت، د هغه سندونو پر بنسټ مشخص او حد فاصل یې تعیین کړ. یاد هیئت پر نوموړي ټینګار وکړ چې له غصب څخه ډډه وکړي او پر هغې ځمکې چې هغه ته پاتې قناعت ولري.
تخنیکي هیئت د خاص کنړ ولسوالۍ پشت بیلي ساحه کې له یوې بلې امارتي ځمکې څخه لیدنه وکړه او د یو شمېر افرادو کار يې پرې بند کړ. یاد هیئت پر هغه کس چې د مالکیت ادعا یې درلودله په جدي توګه ټینګار وکړ چې په یادې ساحه کې له کرکیلې څخه ډډه وکړي.
دغه هیئت له هغه شخص سره چې ځمکه يې پلورلې ده هم غونډه جوړه کړه او اړوند سندونه او وکالت خط له هغوی څخه وغوښته. یاد هیئت هغوی راتلونکې غونډې ته د کرنې ریاست ته هم وغوښتل.
