د ځمکو د غصب د مخنیوي او د غصب شویو ځمکو د استرداد کمېسیون د ناستې جوړیدل
د ځمکو د غصب د مخنیوي او د غصب شویو ځمکو د استرداد کمېسیون ناسته د ۱۴۴۴ هجري قمري کال د ذوالقعدې د میاشتې په ۲۵ نېټه د چهارشنبې په ورځ د عدليې وزارت د سرپرست شیخ الحدیث مولوي عبدالحکیم شرعي په مشرۍ د عدلیې وزارت په مقر کې جوړه شوه.
په دغې ناسته کې د کار او ټولنیوز چارو د وزارت سرپرست الحاج ملا عبدالمنان عمري، د کور او ښار جوړولو وزارت سرپرست مولوي حمدالله نعماني، د فرمانونو او حکمونو د تعقیب او نظارت لوی رئیس مولوي شمس الدین شریعتي، د ځانګړې محکمې رئیس قاضي محمد انور مدثر، د دغې محکمې غړي مولوي شمس الله سالک، مولوي عبدالودود دیوبندي، مولوي صدیق الله مشال او د امارت د قضایاو لوی رئیس او د دغه کمېسیون سکرتر مولوي احسان الله وثیق او نورو مسؤلینو برخه اخیستې وه.
په دغې ناسته کې، د ننګرهار او کابل ولایتونو اړوندو دوسیو په اړه د کمېسیون د غړو او تخنیکي هیئتونو پریکړې او نظرونه وروستي او لاسلیک شول او د تطبیق په غرض د کرنې، اوبو لګولو او مالدارۍ وزارت ته واستول شوې.
دغه راز په یاده ناسته کې، د علاءالدین خیل ښارګوټي، د حبیب الله ځاځي ښارګوټي، سیدجمال الدین ښارګوټي او میرویس ښارګوټي په اړه د کمېسیون پریکړې د دغو ښارګوټو مسؤلینو ته بیان شوې.
