د ښارګوټو او د معاملو د لارښوونې د دفترونو د سندونو د سپارلو موده د یوې بلې اونۍ لپاره تمدید شوه
عدلیې وزارت د ښارګوټو، د معاملو د لارښوونې او موټرو پلورنځیو د اړتیا وړ سندونو د سپارلو موده دې وزارت ته د بررسي لپاره د یوې بلې اونۍ لپاره تمدید کړه.
نن یکشنبه د لړم په ۲۳ نېټه د یوه خبري کنفرانس په ترڅ کې د عدلیې وزارت ویاند مفتی محمد بشار، له دې موضوع خبر ورکړ او د ښارګوټو، د معاملو د لارښوونو د دفترونو او موټرو پلورنځیو له خاوندانو څخه وغوښتل چې د عدلیې وزارت په ګډون اړوندو ادارو ته غوښتل شوي سندونه ژر تر ژره وړاندې کړي.
هغه زیاته کړه چې اړوندو ادارو ته د ښارګوټو د سندونو له سپارل کېدو وروسته وڅېړي څو د ښار جوړوني وزارت له پلان سره سم وي او په هغه صورت چې له خپل حق څخه یې تجاوز کړی وي، د هغوی جواز لغو کېږي.
په دغه ناسته کې، د عدلیې وزارت د امارت د قضایاوو رئیس مولوي محمد نور غاور هم وویل چې د لومړنیو بررسیو پر بنسټ تر اوسه پورې له ۱۰ څخه تر ۱۵ لوی ښارګوټي تثبیت شوي دي چې غیر قانون جوړ شوي او یا ځمکه یې غصب شوي دي.
همدا شان د عدلیې وزارت د معاملو د لارښوونې د چارو رئیس مولوي احسان الله وثیق، وویل چې په کابل ښار کې نږدې ۲۵۰۰ رهنمایي معاملات ثبت شوي او په قانوني ډول فعالیت کوي او نږدې ۶۰۰ رهنمایي معاملات په کابل کې یا یې خپل جواز نه دی تمدید کړی او یا هم بې له جوازه فعالیت لري. د هغه په وینا، د دغو د معاملو د لارښوونو د دفترونو فعالیت غیر قانوني دی.
هغه د معاملو د لارښوونو د قانون په هکله هم وویل چې په اوسني وخت کې شته پخوانی قانون چې د شریعت او د هېواد د ملي ګټو او مصالحو خلاف نه وي، نافذ دی او د هغه پر بنسټ کارونه پر مخ ځي.
