په کندز ولایت کې د ۴۰۰۰ جریبه امارتي ځمکې تثبیت
د کندز ولایت د ځمکو د غصب د مخنیوي د تخنیکي هیئت ناسته د جمادي الاول میاشتې په ۵ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د امام صاحب ولسوالۍ د باسوسو ساحې د ۵۷ جریبه ځمکې، د آقتاش ولسوالۍ د کهنه کلا ساحې د ۱۶۰ جریبه ځمکې، د پوهنتون په سړک کې د تېلو یو ټانک او د یاد ولایت د قوشتپې ولسوالۍ د ۱.۵ جریبه ځمکې دوسیې بحث او بررسۍ لاندې ونیول شوې او په دې هکله لازمې لارښوونې وشوې.
وروسته یاد هیئت د یاد ولایت خان آباد ولسوالۍ ته ولاړ او د یادې ولسوالۍ په ایشان توپ او زردکمر ساحو کې کابو ۴ زره جریبه ځمکه امارتي تثبیت او تشخیص کړه او د راتلونکو اجراآتو په موخه اړوندو مسؤلینو ته لازمې لارښوونې وکړې.
په همدې توګه یاد هیئت د دغه ولایت د آقتاش ولسوالۍ کهنه کلا ساحې ته ولاړ او ۱۶۰ جریبه ځمکه یې له نږدې ولیدله او بررسي کړه او د دغې ساحې د تصرف مخنیوي په منظور یې د یادې ولسوالۍ د کرنې مدیر ته لازمې لارښوونې وکړې.
