په کندز ولایت کې د ۳۰ جریبه امارتي ځمکې استرداد
د کندز ولایت د ځمکو د غصب د مخنیوي تخنیکي هیئت ناسته د ۱۴۴۶ هجري قمري کال د محرم الحرام مياشتې په ۱ نېټه د یکشنبې په ورځ د دغه هیئت د رئیس او غړو په ګډون سره جوړه شوه او په ترڅ کې یې یاد هیئت ۳۰ جریبه امارتي ځمکه استرداد کړه.
دغه استرداد شوې ځمکه د آقتاش ولسوالۍ په غرنۍ ساحه کې موقعيت لري چې څه موده وړاندې د هیئت لهخوا امارتي تثبیت شوې وه.
همدارنګه په دې ناسته کې د مرکز اړوند په عسقلان ساحه کې ۱۰ جریبه او د ګلتپې ولسوالۍ په توبره کش ساحه کې بیا ۲۲ جریبه ځمکه د متصرفینو په اعتراف سره امارتي تثبیت شوه او پرېکړه وشوه چې دوسیې یې بشپړې او د وروستۍ پرېکړې په موخه مرکزي کمېسيون ته واستول شي.
همداراز په ياده ناسته کې د غصب شويو اړوند د ۱۵۶ جریبه ځمکو دوسیې هم تر بحث او بررسي لاندې ونيول شوې.
