په کندز ولایت کې د څه باندې ۴۰۰ جريبه ځمکې بررسي
د کندز ولایت د ځمکو له غصب څخه د مخنیوي تخنیکي هيئت ناسته، د جمادی الأولی د مياشتې په ۲۹ مه نېټه د یکشنبې په ورځ، د تخنیکي هيئت د رئيس او غړو په ګډون جوړه شوه.
په دې ناسته کې، د ياد ولایت د علي آباد ولسوالۍ په ګم سای، حاجي محمدحسین، قوشقاق او لایقه ساحو کې د درېسوه نههدېرش (۳۳۹) جریبه ځمکې، د امام صاحب ولسوالۍ اړوند په الم قشلاق ساحه کې د پنځوس (۵۰) جریبه ځمکې او د قلعه ذال ولسوالۍ اړوند په صافي کوټ ساحه کې د ديارلس (۱۳) جریبه ځمکې دوسیو په اړه بحث وشو.
د تخنيکي هيئت په دې ناسته کې یو هيئت مؤظف شو چې د دغو ساحو په اړه راپور بشپړ کړي او په راتلونکې ناسته کې یې تخنيکي هیئت ته وړاندې کړي.
په دې ناسته کې د کندز ولایت په کچه د ځمکو د غصب اړوند یو شمېر نورې دوسيې هم بررسي شوې او په اړه یې لازم تصاميم ونيول شول.
