په کندز ولایت کې د څه باندې ۱۷۰۰ جریبه امارتي ځمکې استرداد
د کندز ولایت د ځمکو د غصب د مخنیوي تخنیکي هیئت د شعبان د میاشتې په ۱۰ نېټه د دوشنبې په ورځ د ځمکو د غصب اړوند یو شمېر دوسیو په بررسۍ سره، د یاد ولایت د مرکز په عسقلان ساحه کې ۱۷۱۵ جریبه ځمکه استرداد کړه.
یاد هیئت د خپلې نوبتي ناستې په جوړولو سره د عسقلان د بیش بله ساحې د ۱۷۱۵ جریبه ځمکې دوسیه و ارزوله او بررسي کړه. یاده ځمکه د سندونو او د هغو د متصرفینو د اعتراف په اساس امارتي تثبیت شوې وه او هیئت هغه استرداد کړه.
تخنیکي هیئت لارښوونه وکړه چې د اصولو مطابق متصرفینو ته یې د یادې ځمکې د اجارې ورکړې پړاوونه تېر شي.
په دې ناسته کې یو شمېر نورې دوسیې هم بحث او بررسۍ لاندې ونیول شوې او د هغو په هکله لازم تصمیم ونیول شو. دغه راز هیئت له ناستې څخه وروسته چهاردرې ولسوالۍ ته روان شو او په یادې ولسوالۍ کې د هدیرې په ځمکه د دوو قومونو شخړه یې بررسي کړه او په دې اړه لازم تصمیم ونیول شو.
