په پروان ولایت کي د معاملاتو لارښوونې ۲ دفترونه وتړل شول
د پروان ولایت د عدلیې رياست په مشرۍ د کورونو د کرایو د کنټرول ګډې کمېټې په یاد ولایت کې د ذوالحجې د مياشتې په ۱۶مه نېټه د سه شنبې په ورځ د یاد ولایت په مرکز، چاریکار ښار کې د معاملاتو لارښوونې او سوداګریزو مارکېټونو یو شمېر دفترونو څخه نظارت ترسره کړ.
د نظارت په ترڅ کې د یادو دفترونو د ثبت کتابونه، رسمي سټې، لوحې، مهرونه او یو شمېر نور اړين اسناد بررسي کړل چې په ترڅ کې یې ۲ دفترونه د غیرقانوني فعالیتونو او یو شمېر سرغړونو له امله وتړل شول.
همدارنګه د نورو دفترونو مسؤولينو ته توصیه وشوه چې له ټاکل شوي حد څخه د زیاتې کرایې له ثبت او د معاملاتو له ترسره کولو څخه ډډه وکړي.
همداراز کمېټې ټینګار وکړ چې د سرغړونې په صورت کې، مسؤولیت په بشپړ ډول د معاملاتو لارښوونې جواز لرونکي پورې اړه لري او له هغه سره به قانوني چلند وشي.
